علقت الإعلامية داليا فؤاد، على تداول اسمها خلال الأيام الأخيرة عبر مواقع التواصل الاجتماعي في قضية جديدة شغلت الرأي العام، مؤكدة أنها لا علاقة لها بالقضية، ولا تعرف أيًا من الأشخاص المرتبطين بها، ولم ترهم في حياتها.
وكانت محكمة جنايات القاهرة الجديدة، أحالت أوراق 13 متهمًا في قضية المخدرات الكبرى إلى فضيلة مفتي الجمهورية، لأخذ الرأي الشرعي في إعدامهم، بعد إدانتهم بجلب وتصنيع والاتجار بالمواد المخدرة، وذلك من أصل 28 متهمًا شملهم أمر الإحالة.
وقالت داليا فؤاد: “بعد ما المحكمة أصدرت حكمها ببراءتي من اتهام الاتجار بالمخدرات، كنت فاكرة إن أصعب أيام حياتي انتهت، وإن كلمة القضاء كفاية ترجعلي حقي وكرامتي وأبدأ صفحة جديدة في حياتي بهدوء واحترام، ولكن للأسف خلال الأيام الأخيرة فوجئت إن اسمي بيتذكر تاني على السوشيال ميديا في قضية تانية شغلت الرأي العام، وده رغم إني ماليش أي علاقة بيها نهائي، ولا أعرف أي حد من الأشخاص اللي فيها، ولا عمري شوفتهم في حياتي”.
وأضافت “فؤاد”، بحسب منشور لها عبر “فيسبوك”، السبت: “كل شوية بلاقي نفسي بتربط في قصص أنا مش طرف فيها ليه؟ ليه حد يقرر يربطني بحاجات أنا بعيدة عنها تمامًا؟، وأنا خريجة بكالوريوس إعلام، وكنت مقيدة في نقابة الإعلاميين، وتعبت واجتهدت سنين عشان أوصل للي أنا فيه.. ارحموا الناس شوية، لأن كلمة بتتكتب في دقيقة ممكن تفضل تجرح سنين”.
وأوضحت: “أنا غلطت مرة واتحاسبت بالقانون، ومهربتش من مسؤوليتي، لأن مفيش إنسان معصوم من الخطأ، وأخدت العقوبة اللي القانون شافها مناسبة”، وتساءلت: “لكن بعد كل ده ليه في ناس لسه مصممة تحملني اتهامات القضاء نفسه قال إنها غير ثابتة وبرأني منها؟”.
داليا فؤاد: بعت عربيتي عشان أقدر أوفر مصاريف المحامين
قالت: “في لحظة واحدة حياتي اتقلبت، سمعتي اتأذت، أهلي اتأذوا، ونفسيتي اتكسرت بشكل محدش يتخيله، وبعت عربيتي اللي كانت أغلى حاجة أملكها عشان أقدر أوفر مصاريف المحامين وأدافع عن نفسي، وفضلت متمسكة بالأمل إن الحقيقة هتظهر وإن العدالة هتاخد مجراها للنهاية”.
وتابعت: “في كل ده في نيابة ومحكمة وتحريات، والقانون بيدقق في كل كلمة وكل دليل قبل ما يقول حكمه، ومفيش حد فوق القانون، ولو كان في دليل ضدي كنت أول واحدة أتحاسب زي ما غيري اتحاسبوا لما أخطأوا”.
داليا فؤاد: اللي كسرني مش القضية نفسها
أشارت داليا فؤاد، إلى أن ما يؤلمها ليس القضية نفسها، قائلة: “اللي كسرني مش القضية نفسها، اللي كسرني إن في ناس لسه بتحاكمني بعد ما القضاء قال كلمته، وبتكرر كلام من غير ما تتأكد لمجرد الترند والمشاهدات”.
وأضافت: “وفي وسط كل ده في شخص لابس قناع على وشه بيتكلم وكأنه مالك الحقيقة المطلقة، معدوم الرحمة والضمير، بيقول كلام خطير كأنه مش شايف إن ورا كل اسم إنسان بيتوجع وبيتدمر.. يا ريت تفهموا إن الكلمة مش محتوى وخلاص، الكلمة ممكن تهدم حياة كاملة، ممكن فيديو واحد يتعمل عشان حلقة يبان فيها صاحبه قوي، وهو في الحقيقة بيبقى سبب في دمار حد بريء”.
داليا فؤاد: قبل ما تصدقوا أي فيديو أو منشور اسألوا واتأكدوا
قالت داليا فؤاد: “أنا مش بطلب دفاع عني ولا شفقة، أنا بطلب حاجة واحدة بس، قبل ما تصدقوا أي فيديو أو أي منشور اسألوا واتأكدوا واعرفوا الحقيقة كاملة، لأن لأن الكلمة ممكن تدمر إنسانة وأسرة كاملة، أنا ممكن أكون النهارده اللي بتتكلم، لكن بكرة ممكن تكون أختك، بنتك، صاحبتك أو أي حد بتحبه هو اللي بيتظلم ويتحاكم قدام الناس قبل ما الحقيقة تظهر”.
واستطردت:”ادعولي ربنا يجبر بخاطري ويعوضني عن كل وجع شوفته ويبعد الظلم عن أي إنسان”.
اقرأ أيضًا:
وزير الري لـ”مصراوي”: نستخدم زراعة الأرز لزيادة المياه الجوفية والحد من تسرب مياه البحر
تتيح أداء العمرة طوال العام.. ماذا نعرف عن تأشيرة السعودية الجديدة؟
